اسلام آباد۔5مئی(اے پی پی):وفاقی وزیر اطلاعات و نشریات مریم اورنگزیب آزادی صحافت دی عالمی درجہ بندی اچ پاکستان دی 7 درجے بہتری تے تشکر دا اظہار کریندے ہوئیں آکھیے میڈیا کوں زدوکوب، اغواءکرݨ، گولیاں مارݨ، پسلیاں بھن ݙیوݨ، لفافہ، وکاؤ آکھݨ ، غلیظ کردار کشی دی مہم چلاوݨ آلا دور آہستہ آہستہ ختم تھیندا پئے جیں دا عالمی سطح تے وی اعتراف تھیندا پئے ۔ آپݨے ھک بیان اچ وفاقی وزیر اطلاعات آکھیے پاکستان دے متھے تے لڳیا ”میڈیا پریڈیٹر“ دا بدنما داغ دھووݨ دی کوشش کیتی ویندی پئی اے ، ”عمران میڈیا پریڈیٹر“ دا پاتا ڳیا چار سالہ گند ہولے ہولے صاف تھیندا پئے ۔ انہاں پاکستان دے عوام اتے میڈیا کوں مبارخ ݙیندے ہوئیں آکھیے میڈیا فریڈم انڈیکس اچ پاکستان دی پوزیشن بہتر تھیندی پئی اے۔ وفاقی وزیر اطلاعات آکھیے وزیراعظم شہباز شریف دی قیادت اچ ھک سال اچ میڈیا دے حوالے نال پیش رفت تھیوݨ خوش آئند اے۔ انہاں آکھیے اللہ دا شکر اے جو فیٹف دی گرے لسٹ توں نکلݨ دے بعد میڈیا فریڈم انڈیکس اچ بہتری دی ھک ٻئی نیک نامی پاکستان کوں ملی۔ وفاقی وزیر اطلاعات آکھیے اظہار رائے اتے صحافت دی آزادی دی جدوجہد کرݨ، صعوبتاں تے ظلم برداشت کرݨ آلے صحافیاں تے تنظیماں کوں سلام پیش کریندوں ، انہاں دے تعاون و رہنمائی اچ بہتری دا سفر جاری رکھیسوں ۔ مریم اورنگزیب آکھیے میڈیا فریڈم انڈیکس اچ ست درجے بہتری اختلاف رائے برداشت کرݨ دا ثبوت اے۔ آر ایس ایف دی رپورٹ ݙسیندی پئی اے جو موجودہ حکومت میڈیا متعلق جمہوری رویئے تے کاربند اے۔ انہاں آکھیے ست درجے بہتری ایں ڳالھ دا ثبوت اے جو ساݙا پاسہ سدھا تے نیت صاف اے ۔ وفاقی وزیر اطلاعات آکھیے 2022ءاچ عمران خان کوں میڈیا پریڈیٹردا خطاب ݙتا ڳیا ، ایں سیاہ دور حکومت دے آخری سال میڈیا فریڈم انڈیکس اچ پاکستان 12 درجے تلے ڳیا ۔ انہاں آکھیے عمران پریڈیٹردے چار سالہ دور اچ پاکستان پریس فریڈم انڈیکس اچ 18 درجے تلے چلیا ڳیا جݙاں جو وزیراعظم شہباز شریف دی قیادت اچ صرف ھک سال اچ پاکستان دے میڈیا فریڈم انڈیکس اچ 7 درجے دی بہتری آئی۔
