اسلام آباد ۔ 10 مئی (اے پی پی) وزیراعظم شاہد خاقان عباسی آکھے جو کھیڈاں دے شعبے اچ پاکستان دے شاندار ماضی کوں بحال کرنڑ سانگے کارپوریٹ سپانسرز کوں اگوں ودھ تے آپ دا کردار ادا کرنڑاں چاہیدے اتے ملک دے نینگراں دیاں صلاحیتاں توں فیدہ چاونر کیتے انہاں کوں ودھ توں ودھ وسائل ڈیونڑیں چاہیدے ہن۔ انہاں اے گالھ خمیس کوں اتھاں وزیراعظم آفس اچ دولت مشترکہ گیمز 2018ءاچ کامیاب کھڈاڑیاں دے اعزاز اچ تھیونڑآلی تقریب نال الیندے ہوئیں اے گالھ آکھی۔ تقریب اچ وزیر برائے بین الصوبائی رابطہ ریاض حسین پیرزادہ، وزیر دفاع انجینئر خرم دستگیر، وزیر قانون محمود بشیر ورک، وزیر سفیران لیفٹیننٹ جنرل (ر) عبدالقادر بلوچ اور مختلف اولمپک ایسوسی ایشنز دے نمائندیاں اتے کھڈاڑیاں وی تقریب اچ شرکت کیتی ۔ وزیراعظم حکومت دی محدود معاونت دے باوجود ملک کیتے اعلیٰ اعزازات گھن آونڑ اُتے کھڈاڑیاں دی تعریف کیتی ۔ وزیراعظم آکھیا جو دولت مشترکہ کھیڈاں اچ جو کامیابیاں حاصل کیتیاں گئیں او کھڈاڑیاں دی ذاتی کوششاں دا نتیجہ ہے ۔ وزیراعظم آکھیا جو کامن ویلتھ گیمز اچ حصہ گھنڑاں وڈے اعزازدی گالھ ہے کیونجو انہاں کھیڈاں اچ 53 ملکاں دے کھڈاڑی حصہ گھندے ہن ۔ انہاں آکھیا جو کامن ویلتھ گیمز اچ پاکستانی نوجواناں دے میڈلز جیتنڑاُتے خوشی تھئی ۔ بہوں عرصے دے بعد پاکستانی کھڈاڑیاں بہتر کارکردگی دا مظاہرہ کریندے ہوئیں کامن ویلتھ گیمز اچ تمغے جیتے۔ بعد اچ وزیراعظم ریسلر انعام بٹ کو ں50 لکھ روپے مالیت دا چیک پیش کیتا جنہاں کامن ویلتھ گیمز اچ سونے دا تمغہ جیتنڑجڈانجو کانسی دا تمغہ جیتنڑآلے طیب رضا کوں 10 لکھ روپے دا چیک ڈتا گیا۔ وزیراعظم انہاں مقابلیاں اچ شاندار کارکردگی ڈیکھاونڑ آلے بئے کھڈاڑیاں کوں وی انعام ڈتے ۔
.jpg)
